Girawa Axtamarî wilayetê Wanî de qezaya Westanî (bi Tirkî: Gevaş) de orteyê Gola Wanî der yew giraw a.
Rîwayetan ra gore kêna yew keşîşê Armenî ke nameyê aye Tamar bîye, zerr kewta yew şiwaneyê dewanê Wanî. No lacek her şewe asnaw keno gole vîyareno, yeno verê kêneka Armenîye. Seba ke lacek bivişîyo bover, kêneke cayê xo de çila fîna ra ci, xo bellî kena. Pîyê kêneke qe nêwazeno ke kêna xo nê şiwaneyî de dostênî bikero, roca ke puk esto, vecîno teber û çilaya xo fîno ra ci henî fetelîno. Nîya keno heta ke lacek ke gole der o, qefelîya. Teqatê lacekî ke nêmendo, awe de xeneqîno şono. Eke xeneqîya, zirçeno vano "Ax Tamar!" Kêneke ke çitur ney hesnena, a kî xo erzena awe xeneqîna şona. Coka nameyê girawe Axtamar na pira. Na hîkaye goreyê şaîrêde Armenî Hovhannes Tumanyanî qal bîye, bîye efsane.
Girawa Axtamarî de yew kî kîlîsa Armenîyan ebe nameyê Surb Xaçî esta. Kîlîse Qiral Gagikî I. serra 915-921 de da viraştene. Tirkan serra 1915 de kîlîse xereb kerd derwîşî kî pêro kiştî, mal û milk pêro talan kerd. Heta serra 2010 kîlîse cadayîye bîye. 2010 de dewleta Tirkîya oncîa destûr da ci kerd ra. Na kîlîse orteyê Armenîyan de zaf muqeddes a, her ca ra Armenî yenê na kîlîse de îbadetê xo kenê.
